أجرى مصطفي معوض، لاعب نادي بتروجيت، حوارًا مع جريدة “مصر فايف”، تحدث من خلاله عن مسيرته الكروية وبدايته كلاعب كرة قدم، وتحدث أيضاً خلال الحوار عن الأندية التي سبق ولعب بداخلها.
1_ في البداية عرفنا بالنجم مصطفي معوض ومن مواليد كام محافظة ايه ؟
أسمى مصطفي معوض، مواليد 97 قرية الأمير مركز تمى الامديد بالمنصورة.
2_ كيف كانت بدايتك مع كرة القدم ؟
كنت بتمرن في أكاديمية الحفناوى مع كابتن وائل عيسى، ورئيس الأكاديمية كابتن خالد الحفناوى، طبعاً كان عندي موهبة والكابتن وائل عيسي قِدر يِنمي المواهب عندي دي كانت البداية، وبعدين كان فيه إختبارات نادى المصرية للإتصالات عندينا في السنبلاوين، روحت مع كابتن وائل عيسى وربنا كرمني قعدت 3 سنين فتره الناشئين، وبعدين جات الثورة قعدت في البيت لحكم سني الصغير، رجعت نادى الأمير درجه 3 بيتي اللي اتربيت فيه وبلدي مع رئيس النادي الحاج محمود العزازى، قعدت سنتين، وكان وقتها كابتن رمضان السيد رئيس قطاع الناشئين وكابتن احمد عبد الفتاح المدير الفني لفريق 97، وبعدين كان فيه فرقه تسويقية مع كابتن جمعة رمضان روحت معاه لعبت ماتش كانت ضد نادي بتروجيت، وربنا كرمني وبتروجيت اشتراني من نادي الأمير.
3_ ما هي الاندية التي سبق ولعبت لها ؟
نادى الأمير بلدي اللي اتولدت فيها، ونادي المصرية للإتصالات وحالياً نادي بتروجيت.
4_ من هو المدرب الذي كان له الفضل في بروزك واكتشافك ؟
الكابتن وائل عيسى له فضل كبير عليا بعد ربنا، كان عندي الموهبة وهو طورلي فيها، وهو كان بيشجعني دايماً لما كنت معاه في أكاديمية الحفناوي، وهو اللي حطني علي بداية الطريق طبعاً كان سبب من ضمن الأسباب، رغم أنه كان بيتعامل معايا جامد، وكل المدربين اللي اتدربت معاهم ليهم فضل كبير طبعاً بعد ربنا، كنت بحاول اني استفاد من أي حد اشتغل معاه، بيضفولي كتير جداً طبعاً، وأنا اتعلمت من كل مدرب اشتغل معاه وفي نفس الوقت كلهم ناس محترمة، وكلهم ليهم فضل كبير عليا، وأنا مقدرش أنكر حاجة زي كدا، وفيه كمان ناس اشتغلت معايا في بتروجيت الصراحة اتعلمت منه كتير ومنهم الكابتن محمد ثابت طبعاً راجل عظيم راجل يستحق أن يمسك دوري ممتاز، والكابتن خالد صديق الاتنين دول يستحقوا أن يمسكوا دوري ممتاز، دول ناس اتعلمت منهم كتير جداً خلال مسيرتي في بتروجيت، وأول مدرب اتدربت معاه في بتروجيت هو الكابتن أحمد عبد الفتاح برضوا اتعلمت منه كتير، وكان سبب من ضمن الأسباب اني ابقا موجود في بتروجيت.
5_ تمتلك إمكانيات متميزة، ولكنها لم تظهر بأكملها مع الفريق البترولي حتى الآن ؟
اكيد طبعاً عندي حاجات كتير ولكن ليس بالكلام، يجب تقديم الكثير من الجهد والتركيز والتطوير من الذات، وان شاء الله إسعى أن أقدم حاجه لفرقتي وأكون عند حسن الظن، ونقدر كلنا كفريق إننا نصعد للدوري الممتاز ونرجع لمكانتنا الطبيعية أن شاء الله.
6_ هل يفكر مصطفي معوض فى تجربة الاحتراف ؟
أكيد أي لاعب بيتمني إنه يوصل للاحتراف والتقدم للأمام، لكن كل حاجه ليها وقتها، ولازم نمشي خطوه بخطوه، والسعى دائماً لتقديم الأفضل وبذل قصار الجهد للتطوير أن شاء الله.
7_ كيف تري مصطفي معوض في نادي بتروجيت ؟
انا لازم ابذل كل ما يملك من جهد وتعب تجاه الفريق، وباقي الفريق كلهم اخواتي طبعاً، للرجوع بالفريق لمكانته الطبيعية في الدورى الممتاز أن شاء الله.
8_ هل تشعر بالراحة النفسية في نادي بتروجيت ؟
بالتأكيد أشعر براحه نفسية داخل بيتى نادي بتروجيت.
9_ من أهو الفريق المحبب لك بعد ناديك ؟
اكيد طبعاً نادي ريال مدريد الإسباني.
10_ من افضل لاعب في العالم من وجهة نظرك ومن هو مثلك الأعلى في الملاعب ؟
أفضل لاعب حالياً كريستيانو رونالدو، وقدوتي في كرة القدم لاعب ريال مدريد سيرجيو راموس.
11_ ما طموح مصطفي معوض في المُستقبل القريب ؟
سقف طموحي ملوش حدود بفضل ربنا، كل يوم بيعدي عليا بعتبره بداية جديدة وبحاول اجدد طموحي، دون شك لابد من وجود إطار زمني محدود به حفاظاً من التسيب أو إضاعة الوقت، بس من ضمن الـــ”Goals” اللي حاطتها لنفسي الفتره القادمة أن إسعى واصعد بفريق بتروجيت للدوري الممتاز، واللعب في الدورى الممتاز، وأنا ببذل أقصي مجهودي عشان اوصل لـ حلمي، وان شاء الله خلال الخمس سنوات القادمة أكون أفضل مدافع في مصر سواء اللعب بالدوري الممتاز أو الإحتراف الخارجي مع إحترامي لجميع اللاعبين تكون منافسة شريفة، ودا كله ميكونش من فراغ، محتاج سعى وإجتهاد وتعب وإنكار للذات والتطوير المستمر أن شاء الله.
12_ ما هي أجمل محطة في حياتك الكروية ؟
أجمل محطة في حياتي كانت السنة اللي فاتت لما خدت إعارة لنادي منتخب السويس في الممتاز ب، طبعاً هي من أجمل محطة في حياتي، عشان انا استفدت كتير السنة دي، وكسبت خبرات كبيرة جداً، وفي نفس الوقت اتعرفت علي جمهور كبير، وجمهور بيعشق ناديه فعلاً، وكان عندي ومن صغري اني العب في نادي جماهيري والصراحة محسيتش بكدا غير وانا بلعب في السويس، الناس في السويس بتعشق حاجة اسمها منتخب السويس، وأتمنى التوفيق طبعاً لنادي منتخب السويس، وهي من أجمل المحطات في حياتي بل أجملهم من حيث الخبرات اللي انا كسبتها والمواقف اللي اتعاملت معاها.
13_ ما رايك في توقف المسابقة والنشاط الرياضي ؟
قرار توقف النشاط الرياضي قرار سليم، كان حتماً ولابد لازم القرار دا يتاخد، لمنع من انتشار فيروس كورونا المستجد ولمنع التجمعات، وزي ما احنا عارفين ان نشاط الرياضة واي رياضة مش شرط كرة القدم فقط، تعتمد علي التجمعات، كان لازم القرار دا يتاخد عشان ميحصلش تزايد في انتشار الفيروس، والقرار قرار سليم طبعاً ويحترم، وان شاء الله خير.
ربنا يوفقك ياحبيبي ان شاء الله