سعد محمد، ابن محافظة سوهاج مركز دار السلام ومن قرية اولاد خلف، ناشئ نادي الزمالك مواليد 2000، الذى يُعانى من المرض الخبيث “سرطان الدم”، أحد أبرز القصص الإنسانية التى شغلت الرأى العام مؤخراً، حيث ظهر نجم الفريق الأبيض علي قناة الزمالك مع خالد الغندور، معلناً إصابته بالمرض اللعين، وتداول الكثير من الجماهير علي مواقع التواصل الإجتماعى “تويتر وفيس بوك” هاشتاج تحت عنوان أدعم سعد محمد، بعدما كسب تعاطفاً كبيراً من قبل جماهير الكرة المصرية وذلك للتعبير عن تضامنهم الكبير مع اللاعب بعد إعلان إصابته بالسرطان.
1_ في البداية من هو سعد محمد ومن مواليد كام ؟
في البداية بسم الله الرحمن الرحيم، انا اسمي سعد محمد أحمد من مواليد 7/7/2000، من محافظة سوهاج مركز دار السلام قرية اولاد خلف.
2_من مكتشف سعد محمد في كرة القدم ومين اللي وصلك لنادي الزمالك ؟
الذي اكتشفنى “محمود الملك” كان مُدرس، ولكنه يهوى كرة القدم، وبالنسبة لإلتحاقي بنادى الزمالك، قمت بشراء تذكرة أداء إختبارات الإلتحاق بالنادي قيمتها 30 جنية، ثم قمت بتأدية الإختبارات ونجحت فيها وانضميت لنادي الزمالك.
3_ كيف استقبلت خبر مرضك ؟
هي كانت صدمة بالنسبالي وبعد ما سمعت الخبر اتوضيت وصليت ركعتين والحمد لله، وحمدت ربنا اولاً واخيراً.
4_هل رفضت دعم تركي آل شيخ بشأن معالجتك ؟
ليس ترك آل شيخ بعينه وهناك أشخاص المحت لي أنه هو، وفيه مجموعة من الإعلاميين حاولوا التواصل معي في الفتره اللي النادي مكنش واقف معايا فيها، وكان النادي على غير علم فهما أرادوا أن أظهر في فيديو وأقول هذا الكلام مقابل فلوس، او هيوصلوني بأحد، ومن الممكن ان يكون تركي آل شيخ او غيره في سبيل أن أقول أن النادي لم يقف معي، وانا رفضت أن اقول اي شئ ضد النادي بتاعي.
5_ كيف تعامل الزمالك معك في هذه المحنة ؟
بصراحة في اول سنة مكنتش معرف فيها النادي، محدش كان متواصل معايا، ولما عرفوا وهما واقفين معايا بصراحة دلوقتي ووعدوني بالسفر برا مصر، بس دلوقتي الدنيا واقفة بسبب مرض كورونا.
6_ أفضل شخص وقف بجانبك خلال هذه الأيام ؟
اللي وقف معايا في الفترة دي أهلي “امي واختي وابويا”، وفيه شخص عزيز عليا اسمه عبدالرحمن دا وقف معايا من اول فترة تعبي.
7_ رسالتك لجماهير الزمالك خلال الفترة الحالية ؟
هي مش جماهير الزمالك فقط، جماهير مصر كلها، واي حد وقف جنبي ونزلي “تويتر او فيس” بشكره طبعاً من كل قلبي، ربنا يخليهم ليا، الناس كلها وقفت جنبي، ونادي الزمالك عظيم بجمهوره ومن غير الجمهور الزمالك ولا حاجة طبعاً، واي نادي من غير جمهورة ولا حاجة، والنادي الزمالك دا شئ عظيم والجمهور ناس كويس جداً وناس عظيمة وبحب اشكرهم من كل قلبي.
8_ هل تحدثت مع مرتضي منصور خلال هذه الفترة ؟
لا انا متواصلش معاه في الفترة الأولى، بس بعد ما الدنيا اتقلبت علي السوشيال ميديا وقف معايا بصراحة ولحد هذه اللحظة واقف جنبي.
9_ ما هي الخطوات التي تسير عليها حالياً ؟
المفروض اني أسافر، بس زي ما انت شايف قدامك الطيران واقف وكل حاجه واقفه، ولحد الآن النادي مردش عليا في القصة دي، وانا مستنيهم يردوا عليا، هسافر أنهي دولة وامتا.
10_ ما رايك في توقف المسابقة والنشاط الرياضي ؟
هو شئ مؤسف بصراحة، وبعدين العالم كله من اقوي الدوريات وقفت، هتيجي هنا انت في مصر مش هتلاقي جماهير في لازم توقف برضوا، السلامة الصحية بتاعت اللاعيبه وبتاعت الأجهزة الفنية، المرض خطير مش شئ سهل، الناس كلها بتقول عليه سهل ومتهاوده بيه لكن هو شئ صعب.
11_ هل انت مع فكرة إلغاء بطولة الدوري هذا العام ؟
والله انا مع هذا القرار وضده فى نفس الوقت، معه لأن سلامة اللاعبين اهم من إستكمال الدوري خاصةً بعد انتشار فيروس كورونا، وضده لو اتخدوا القرار بسرعة، لازم نستنى ونشوف تطورات الفيرس الأول وبعدها يأخذوا القرار.
12_ في نهاية الحوار حابب تختم كلامك بايه ؟
احب اشكر كل الناس اللي دعمتني وسندتني ووقفت معايا، واي حد كلمني فون أو واتساب، وبعتذر للناس كلها، بعتذر لأي حد معرفتش ارد عليه، والاعتذار دا قبل الشكر، وبشكر كل الناس اللي وقفت جنبي.
بالنجاح والتوفيق ودائما في تقدم