النهارده هقدم لكوا كبسة الفراخ بطريقة سهلة وجديدة ، كانكوا معايا بالمطبخ ، من المعروف ان الكبسة فى السعوديه باللحمة الضانى ، والنهارده لكل اللى عاملين رجيم او مبيحبوش اللحمة الضانى او بيحبوها بس عاوزين تغيير اقدام لكوا كبسة الفراخ ، اكلات كثيرة جديدة ممكن تستخدمى فيا الفراخ جربوا وراك الفراخ المحشيه رائعه.
المقادير :.
شريحة زبدة+معلقة زيت +بصل وتوم مفرومين حوالى 6 فصوص توك وبصلة كبيرة + فرخة مقطعة اربعه +( ملح وورق لورا وحبهان وفلفل اسود بودرة وفلفل اسود عادي ومعلقة كبيرة بهارات مشكلة ومعلقة صغيرة بهارات برياني ) كل دا عند العطار+ كبايتين مية مغلية + كباية رز بسمتي + حبة لوز منقوعين فى مية+ بطاطس محمرة وبصل محمر للوش.
الطريقة بقى سهلى جدا وهقولها زى ماعملتها اول حاجة حطيت شريحة زبدة ومعلقة زيت وبصل وتوم وشوحتهم وبعدين حطيت الفراخ قلبتها معاهم شوية بعدين حطيت ملح وورق لورا وحبهان وفلفل اسود بودرة وفلفل اسود عادي والبهارات .
وقلبتهم مع الفراخ وبعدين حطيت كبايتين مية مغلية سبتهم حوالي 25دقيقة وبعدين حطيت كباية رز بسمتي وقلبتهم في بعض ولما الشوربة غلت ع الرز وطيت خالص وقفلت عليها لحد ما استوت . وبعدين طلعت الفراخ حمرتها . وتعالى بقى على حبة لوز المنقوعين في مية حمرتهم بالزبدة ، فرغت الرز وفوقيه الفراخ وفوقيهم البطاطس والبصل واللوز لزوم الشكل وسلطاتك جمبها وبالف هنا ، جربوها وعلى ضمانتى .