علق الإعلامي عمرو أديب على الفيديو المنتشر للأب الشجاع الذي وضع نفسه بين ابنته والقطار لإنقاذها من الموت المحقق بالإسماعيلية، وذلك خلال حلقة الأمس من برنامج “الحكاية” المذاع على قناة “أم بي سي مصر” الفضائية.
فروى عمرو أديب تفاصيل ما حدث قائلا “أنا أراها قصة إنسانية ولكن فيها درس، رجل مصري، معاه بنته أو ابنه، واقفين في محطة قطار الإسماعليلية، الراجل اكتشف إنه واقف في الرصيف الغلط، والقطر اللي هو هيركبه جاي على الرصيف الثاني، فعبر من الرصيف، فبنته قررت تعدي من تحت قطر البضاعة وتطلع من الناحية الثانية، واتعكبلت قرب الرصيف، راح الأب بشكل تلقائي رامي نفسه على ضناه”.
وتابع عمرو أديب قائلا “أقل حاجة نقلها أديني عمر وأرميني تحت القطار، هذا الرجل وابنه لو هدومهم شبكت في القطر كانوا راحوا هما الأثنين، إنما ربك ستر، والأمر نزل فدى ابنه أو بنته، ويمضي القطار وبينهم شيء لا يذكر”.
وأردف أديب قائلا “طول القطر وهو ماشي الناس عماله تقول يا ساتر يا ساتر، لحد ما ربنا ستر فعلا وعبر القطار والأب وبنته ربنا كرمهم، وقدروا يخرجوا ناجيين، والشعب المصري الجميل المحترم احتضنوا الراجل، العيل أو العيله قعدوا ربع ساعة مبينطقش”.
وأضاف أديب “هيئة السكة الحديد طلبت تفريغ الكاميرات عشان يعرفوا ماذا حدث بالظبط، الدرس اللي إحنا نقوله لما نيجي نعدي للقطر عدوا من النفق أو من السلم”.