بالفيديو| أول مداخلة هاتفية لزهرة ضحية التحرش بالمنصورة:لبسي مكنش ملفت وفي لبس أسخم من كده

بالفيديو| أول مداخلة هاتفية لزهرة ضحية التحرش بالمنصورة:لبسي مكنش ملفت وفي لبس أسخم من كده

روت زهرة ضحية التحرش في المنصورة، تفاصيل ما حدث لها من تحرش جماعي ليلة رأس السنة في المنصورة، وذلك خلال مداخلة هاتفية مع الإعلامي عمرو اديب بحلقة الليلة من برنامج “الحكاية” المذاع على “أم بي سي” مصر الفضائية.

فعلق زهرة قائلة “جيت عند  منطقة المشاية، وكنت رايحة أتعشى مع ناس أصحابي، والطريق كان زحمة، فنزلنا من التاكسي ناخد المسافة اللي باقية على رجلنا، أبتدى ناس تمشي ورانا، وأنا قلقت، ولفيت وشي، فضلوا جايين ورايا، وقفت مكاني، وكانوا مجموعة حوالي 30 واحد، مشيت وكملت، وزميلتي شدتني، صاحب محل الموبايلات زقني ودخلني جوا، وده عمل ضجة أكثر، فخرجنا عشان خاف على المحل بتاعه”.

وتابعت زهرة “لما خرجت أتصدمت من العدد، وروحت دخلت بيوتي سنتر فضلت جواه، كلمنا ظباط صحابنا محدش قدر يعملنا حاجة، وكانوا بره عمالين يقولوا إنزلوا، مش عارفه ننزل عايزين مننا إيه بصراحة، وبعد كده بتوع البيوتي سنتر خافوا ونزلنا واحدة بواحدة”.

وأردفت “صاحبتي في شباب نزلوها بسلام، عشان كان بينزلها 4 أنا اللي نزلني واحد بس، ولقيت هدومي بدأت تتشد وناس حاطه إيديها في أماكن غلط، وابتديت أصرخ، بعد كده العربية اتحركت وخدت صاحبتي وروحنا”.

وأضافت زهرة قائلة “أنا حرة في لبسي ده حرية شخصية، وأنا شايفة إن لبسي مش ملفت وفي لبس أسخم من كده، والدين أمرك تغض بصرك، وأنا متنازلتش عن المحضر، أنا قلت إن اللي مقبوض عليهم دول شباب في ثانوي ومش دول اللي اتحرشوا بيا”.