استنكر الإعلامي عمرو أديب واقعة التحرش الجماعي التي حدثت ليلة رأس السنة في المنصورة، وذلك خلال حلقة الأمس من برنامج “الحكاية” المذاع على قناة “أم بي سي مصر”.
فعلق أديب قائلا “التعليقات الخاصة بلبسها، بيقولوا شايفين لابسه إيه، عشان لابسة قصير بيدوا مبرر للشباب إنه يتم استحلالها، يعني هو ربنا قال كده يا جماعة في حاجة في القرآن أو السنة أو الإنجيل، فين غض البصر، وفين سترها، إيه اللي جرا يا جدعان، إيه التوحش اللي إحنا فيه ده”.
وأردف أديب قائلا ” المواقع الأجنبية عاملة لنا فضحية، كلهم بيتكلموا إن المصريين 500 واحد جريوا وراء بنتين، ويرجع يقولك الشعب المصري متدين بطبعه، لأ إحنا محتاجين نراجع الرجولة والشهامة والتدين، ونراجع عبارة، معندكش أخوات بنات يا كابتن”.
وتابع أديب “إيه اللمسة اللي هتلمسها لواحدة وأنت بتجري هتطفي نارك يعني، لما تقرأ أقوال البنت تبقى مكسوف من نفسك، لما تقرأ الكلام بتاع الناس اللي أنقذوا تتكسف، يعني ال9 شباب اللي أنقذوها لو مكانوش موجودين كان حصلها إيه، كان ممكن الشارع ده يبقى عامل إزاي، كانت الناس دي هدومها هتفضل عليها لأخر الليل ولا إيه”.
واستطرد أديب “اللي هيقولوا بتعمم يعني لما يبقوا 500 اللي بيتحرش واللي بيتفرج، مفيش راجل قيادة راجل كبير، وإيه اللي جمع الناس دي كلها، ساعتين ونص بيجروا وراء البنتين في شارع رئيسي في محافظة مصرية كبيرة”.
وواصل “أنا مش ضد صاحب المحل مهما كانوا بيكسروا له المحل هيعمل إيه يعني، ليه معندناش علماء نفس تقولنا الناس دي جواها إيه، ده هو ده الخطر”.