ألقى الفنان الكوميدي أحمد حلمي كلمة مؤثرة عن الإنسانية في افتتاح فعاليات منتدى شباب العالم في نسخته الثالثة، بمدينة شرم الشيخ بمحافظة جنوب سيناء، وأمام الرئيس السيسي وكبار الشخصيات، وشباب العالم.
فبدأ حلمي حديثه قائلا “أحب أعرفكم بنفسي، أنا اسمي ….، أنا منستش اسمي أنا فاكره كويس، بس لوهلة حسيت إني مش مهم أقوله، بس أنا ممكن أقول جنسيتي، أنا حافظ جنسيتي صم، وحافظها أكثر من اسمي، بس حقيقي حسيت إنه مش هيفرق أوي أقول اسمي أو جنسيتي في معنى الكلام اللي عايز أقوله”.
وتابع حلمي قائلا “يعني مثلا لو حبيت أقول كلمة زي أنا إنسان، هل معنى الجملة دي هيختلف لو قولتلها وأنا إبراهيم أو جورج، هل معنانها هتفرق من إنسان لإنسان تاني لو كانت ديانتهم مختلفة عن بعض”.
ومازح حلمي الحضور بخفة دمه المعتادة قائلا “هل هتفرق أو هتحلو لو اللي قالتها ست بدل راجل، أنا شايف إنها هتفرق وهتحلو، معلش إنها نصير الستات”.
وأضاف حلمي “أنا شايف إن الجملة هتفضل زي ما هي أيا كان مين اللي قالها، لأن رغم اختلفنا عن بعض كبشر، ربنا جمعنا تحت مسمى الإنسانية، اللي بتخليك تتقبل الأخر، وتحبه وتسمعه، وأعتقد إنه مش من الإنسانية إننا نحول قيمة وعظمة ونعمة الاختلاف إلى خلاف”.
