أعلن الإعلامي شريف مدكور عن إصابته بفيروس جديد في الدم، بسبب العلاج بالكيماوي، وعدم إلتزامه بإرشادات الطبيب، وذلك عبر فيديو نشره على صفحته على ” فيس بوك”.
فقال شريف “أي حد بياخد كيماوي مناعته بتقل، أنا كابرت شوية وبقيت أنزل الشغل عادي، وأعافر وانزل واسوق العربية، في بعض الإرشادات اللي كانت متقاله لي انا معملتهاش، والناس لما كانت بتسلم عليا كنت بسلم عليهم، ولما كنت بلاقي حد داخل يسلم عليا ويبوسني كنت ببوسه، فجالي فيرس بقالي ٥ أسابيع، وده فيرس في الدم وعند كل الناس الفيرس ده موجود، بس بنسب قليلة أنا ارتفع عندي إلى ٩٠٠، وهذا أدى إلى ارتفاع درجة حرارتي بقالي ٥ أسابيع إلى ٣٩ ونص”.
وأردف مدكور “الفيرس ده ملوش علاج غير إن الجسم يتخلص منه، وجسمي بيحاول يتخلص منه بس أنا عندي أنيميا بسبب الكيماوي، جسمي هلك عشان يقدر يتخلص من الفيرس، هو لسه مطلعش من جسمي بس الحرارة قلت”.
وتابع “نقلت دم في مستشفى دار الشفا عشان جسمي يساعد نفسه ويقوى، مش عايز أي حد عنده كانسر يقلق، أنا اللي أهملت، نزلت واشتغلت وده مكنش صح”.
وأضاف “لكل مرضى الكيماوي بلاش الأحضان والبوس من غير ما حد يزعل، أنا في حلقات الأطفال كنت بتكسف مسلمش عليهم، مش هسلم على حد ثاني، وهلبس كمامة في الأماكن الزحمة”.
اللهم اشفي كل مريض يارب العالمين اللهم عافي مرضنا اللهم اشفي انت الشافي لا شفاء إلا شفاؤك شفاء لايغادر سقما يارب العالمين