كشف الإعلامي تامر أمين، تفاصيل خاصة بالهشتاج الذي أطلقه المقاول محمد علي عبر تويتر، للهجوم على الرئيس السيسي، وذلك خلال حلقة الأمس من برنامج “آخر النهار”.
فعلق أمين قائلا “الحرب الإلكترونية يعني حرب السوشيال ميديا حرب الجيل الرابع اللي الدولة حذرت منه كتير، وإحنا في الإعلام نبهنا حضراتكم منهم كتير، القاعدة تقول أنه ليس كل ما يلمع ذهبًا، ده مطلي ذهب، إنما هو في الأصل صفيح وخردة، وده اللي بتعمله دلوقتي المليشيات الإخوانية واللي وراهم ومن ولاهم، والأجهزة المخابراتية اللي عايزة طول الوقت تفتت عزيمة الشعب”.
وتابع أمين “بيفبريكوا فيديوهات يحاول يحسسك إنها في مصر، وهذا الفيديوهات لا علاقة لها بما يحدث في مصر، شبه الهبل اللي كان معمول من أربع أيام، إحنا بنقولكم الحقيقة المجردة زي ما هي، دلوقتي مبقاش ينفع يكدب، لأن دلوقتي لو أنا كذبت هيبقى شكلي عبيط لأن في مصادر كتير للأخبار، والمشاهد أوعى وأذكى من اني أضحك عليه”.
وأضاف أمين “هاشتاج من كام يوم اللي عملوا الأخ محمد علي من بره، ومرة واحدة قالك الهاشتاج وصل لمليون في يومين، ياه للدرجة دي عملنا، تويتر ده موقع كبير، الحاجات المريبة دي بيبحث عليها فورًا، وتويتر اكتشف إن الهاشتاج ده كله ضرب، 99% من اللي داخل فيه صفحات فيك، صفحات مضروبة، ومزعومة ليست لأشخاص حققيين”.
وأكمل أمين “لما تويتر اكتشف الفبركة، شال كل الأرقام المضروبة، واتبقى 16 ألف فقط من كل دول العالم، تخيل من مليون ل 16 ألف، هي دي الحرب النفسية عن طريق السوشيال ميديا لعنها الله في كل كتاب طالما تستخدم بشكل سيء”.