علق زاهي حواس، وزير الآثار الأسبق، على ما قاله أبرز مناصري نظرية المؤامرة، سكوت وارنغ، حول العثور على تماثيل الفراعنة الموجودة على كوكب المريخ.
استنكر هذا الكلام حواس، خلال مداخلة هاتفية مع برنامج “يحدث في مصر” مع الإعلامي شريف عامر قائلًا “نمرة واحد في ناس مجانين كتير بموضوع الأهرامات ده، جنون اسمه الأهرامات، فهما طبعا كل مدة يطلعوا كلام، مرة يقولك إن اليهود هما اللي بنوا الأهرامات، في برنامج تليفزيوني بيتعمل في لوس أنجلوس، بصفة دائمة بيتكلم على إن الناس اللي كانوا في المريخ هما اللي بنوا الأهرامات”.
وتابع حواس “طيب الكلام دلوقتي عن العثور على تابوت فرعوني على المريخ، طب اللي اكتشف هذا الاكتشاف مش بيجيب صورة ويعلن ده رسمي، يعني المفروض ناسا تعلن ده رسمي”.
وأضاف حواس “أي واحد من الناس دي لما بيقفوا قدام الهرم مش بيصدق إن اللي بنى الهرم ده إنسان عادي زينا، وده اللي خلاهم مقنعين إن اللي بنوا الأهرامات أشخاص قادمين من الفضاء”.
واستطردت حواس “خزعبلات، وجنون، وإقتناع 100% إن اللي بنى الأهرامات مش بني آدمين، راج متخلف بيطلع أي كلام، كلام يعمل بلبلة”.