استنكر الإعلامي عمرو أديب جريمة قتل مُشرَّد بسبب زجاجة مياه غازية، في أحد أحياء القاهرة، وتناول البعض الجريمة بطريقة تدين مصر والمصريين.
فعلق أديب خلال حلقة الأمس من برنامج “الحكاية” قائلًا “أحد الشباب كان معدي في شارع عدلي وسرق من سوبر ماركت “زجاجة حاجة ساقعة” أصحاب المحل ضربوه علقة موت فمات، تصرف وحشي وقاسي، وأنا واقف عند حكاية تم تداولها إن مصر الناس بتموت فيها عشان إزازة حاجة ساقعة، الواد كان نفسه في إزازة حاجة ساقعة ومات عشان يعرف يشربها، حضراتكم تعلموا إن مصر مش كده”.
وتابع أديب غاضبًا “إحنا شعب رحيم وجميل وجيد، وبيفهم في الأصول وبيشيل بعضه، والبلد دي محدش بيبات فيها من غير عشا، إحنا مش وحشين كده، كلكم عارفين البلد دي شايلة بعضها إزاي”.
وأضاف أديب “مصر مش كده، لو في ناس مجانين، ومفيش في قلوبهم رحمة، دي البلد اللي بتلم فلوس عشان تطلع الغارميين من السجن، مفيش حد في البلد دي مبيعملش خير، مقدرش أقولك إننا في سويسرا والمستوى الاقتصادي عظيم، عشان مبقاش كذاب بس كمان إحنا مش بالوحاشة دي يا أخي”.
https://www.youtube.com/watch?v=1-Mr8wqbFKY