وانج فو Wang Fu .. مطعم صيني في شارع الهرم
المطعم الصيني وانج فو wang fu

خارج المولات ممكن تلاقي مطاعم أكل صيني لكن مش بشكل كبير، المرة دي قررت أجرب المطعم الصيني الوحيد في شارع الهرم وهو مطعم وانج فو Wang Fu الصيني، ورغم انه من بره تحس انه ممكن يكون مقفول بقاله فترة الا انه شغال وبيستقبل الزوار عادي بالعكس من الداخل مطعم كبير وفيه طرابيزات كتير وله ديكور قديم لكن مميز.

مطعم وانغ فو من الداخل
مطعم وانغ فو من الداخل

لما دخلت كانت الساعة تقريباً 6 قبل المغرب والمطعم كان خالي تماماً من الزبائن زي ماهو واضح في الصورة، سألت العاملين بالمطعم قالوا لي ان معظم شغلهم حجز شركات مش أفراد وخلال الفترة اللي كنت موجود فيها فيه ناس جت على طربيزتين، المهم طلبت المنيو واللي كانت متنوعة وكبيرة فيها أصناف كتير من مقبلات وشوربة، بالإضافة إلى أطباق اللحم والدجاج والبحريات والبط كمان.

طلبت سبرنج رول بالخضروات بس للأسف مكنش موجود ودي حاجه غريبة شوية في مطعم صيني لأنه من المقبلات اللي تعتبر أساسية، وطلبت نودلز (مكرونة) بالفراخ، باللإضافة إلى فراخ سويت آند سور (حلو وحامض) ودي تعتبر مشهورة كذلك في المطاعم الصيني ده بعد ما اكتشفت ان الفراخ بالكاجو مش موجوده عندهم برده، وطلبت شوربة هوت آند سور.

خلال تلت ساعة تقريباً كان الأكل جاهز أول حاجه الشوربة كانت مقبولة بشكل عام، و النودلز كانت جيدة، أما بالنسبة للفراخ فكانت دون المستوى بشكل غريب، الصوص فيها قليل ومش معمولة بشكل كويس ولا مستوية بالشكل المطلوب، وباين انها مقلية ومش واخدة طعم خالص مع ان ده طبق أساسي برده مينفعش يبقى بالشكل ده.

الأوردر المطلوب من المطعم الصيني
الأوردر المطلوب من المطعم الصيني

كتقييم ممكن أقول 3 من 5، المطعم مش مميز أو فيه حاجه زيادة عن المطاعم اللي في المولات باستثناء ان الكمية كويسة (طبعاً بتدفع أكثر في المقابل)، وانج فو مطعم صيني معقول في شارع الهرم بعد محطة العريش على مسافة قريبة من بافلو برجر ومطاعم تانية، لو عاوز تروح تجرب أكل صيني وقريب من هناك روح بس هتاكل اكل صيني عادي متتوقعش حاجه اوفر.

تابعنا على المواقع الاجتماعية ليصلك الجديد أولا بأول

التعليقات

اترك تعليقاً

لن يتم نشر عنوان بريدك الإلكتروني.