مطعم خيم المندي .. تجربة معقولة و لكن ..
مطعم خيم المندي

في الأيام البرد اللي بنعيشها دلوقتي بيبقى الاكل مهم أكتر من العادي لانك بتجوع بسرعه و بتاكل أكتر من الطبيعي، كنت أنا و 2 من صحابي قررنا من فترة اننا نجرب نروح مطعم خيم المندي و اللي سمعنا انه من أحسن مطاعم القاهرة اللي بتقدم مندي، رغم ان القرار كان بقاله فترة كبيرة لكن كان فيه موانع منها بعد المكان اللي على طريق كرداسة عن مكان شغلنا اللي هو في وسط البلد لكن في النهاية قررنا نروح.

أول حاجه المكان بيوفر لك اكتر من شكل للقعدة بما فيها القعدة العربي و دي اللي اخترناها لانها كانت يمكن الاريح بعد طريق طويل، المنيو متنوعة بين ركن المندي و بين المشويات العادية، قررنا نطلب الوجبة الأساسية و هي طبق لحم ماعز ( 65 جنيه) مع حاجات مختلفة منها مندي فراخ (نص فرخة 25 جنيه ) و طبق محاشي و سمان مشوي ( الفرد 25 جنيه)، انتظرنا الأكل و اللي متأخرش كتير و جه معاه سلطة طحينة و سلطة خضراء.

الأساس في التقييم كان الوجبة الأساسية و هي مندي لحم الماعز، الكمية كانت معقولة تقريبا حوالي 1/4 كيلو مع الأرز البسمتي اللي للأسف مكنش سخن بالشكل الكافي و يمكن ده بسبب برودة الجو، جودة اللحم متوسطة و القطع كانت مختلفة الجودة بشكل واضح لكن في المجمل كويسه، علشان اوضح برده ممكن بالنسبة لشخص عاش في الخليج فترة و أكل المندي على أصوله يبقى تقييمه لمطاعم المندي هنا في مصر من سئ الى متوسط لأن تقريبا مفيش مطعم مندي واحد في مصر بيعمل مندي بالشكل الموجود بره ولا حاجه حتى قريبه منه، مطاعم المندي المختلفة زي حضرموت بفروعه مش بتوفر تجربة حقيقية للمندي و أفضل ما فيها متوسط و هو التقييم اللي ممكن يوصل له خيم المندي و ان كان العمودي مثلا في المهندسين نقدر نقول انه افضل منه.

لو لحم الماعز حصل على تقييم 70% فنقدر نقول ان مندي الفراخ اخره 40% للأسف الفرخة كان طعمها غريب شوية و أقرب للمسلوقة مع طعم دخان غريب موجود فيها، السمان كان يمكن أفضل حاجه طلبناها كتسوية و طعم، أما المحاشي فكانت معقولة يعني مش حلوة ولا وحشة حاجه في النص كده و هو ده تقييم المطعم ككل.

أفضل ما في المطعم هو ان القعدة كانت مريحة و الجو العام كويس و تعامل العاملين كان محترم و طيب، يمكن أسوأ حاجة كانت الفراخ اللي كانت مدخنة بشكل غريب، في المجمل ممكن تروح انت و صحابك للمكان كنوع من التجربة الجديدة اللي ممكن تعجبك و يبقى تقييمها اعلى من كده لو انت مكلتش مندي بره مصر قبل كده، تقييمي كان 70% لكن تقييم أصدقائي ممكن يتجاوز 80%، خيم المندي تجربة جيدة لكن مش الأفضل.

تابعنا على المواقع الاجتماعية ليصلك الجديد أولا بأول

التعليقات

اترك تعليقاً

لن يتم نشر عنوان بريدك الإلكتروني.