كبابجي أبو طاهر السياحي اسم مطعم كان بيلفت نظري كتير و أنا معدي في شارع الجيش بعد ميدان باب الشعرية، في نفس المكان جنب بيبيتو و قريباً من زيزو و بابا عبده، منطقة فيها مطاعم مميزة ليها طابع خاص، لو بتحب تجرب مطاعم مختلفة ممكن تنزل هناك و تقرر.
صحابي اللي رحت معاهم قبل كده في خيم المندي اتفقنا المرة دي اننا نجرب مطعم جديد بس مش بعيد عن وسط البلد، جربنا قبل كده بيبيتو و صلاح في نفس المنطقة، جه الدور المرة دي على مطعم بيلفت النظر كل لما بتعدي عليه و هو كبابجي ابو طاهر السياحي زي ما هو كاتب على واجهة المحل بتاعه.
فيه 2 كبابجي أبو طاهر واحد كبير و مكتوب عليه ابو طاهر السياحي و ده اللي جربناه و التاني جنب بيبيتو على طول و ده مفهوش مكان مخصص للأكل داخل المطعم، لما بتدخل بيقابلك عدد كبير من الطربيزات في مكان مش كبير نسبياً، قررنا نقعد و لفت انتباهنا ان المحل مش بيقدم غير كباب و كفتة و موزة و سجق بالإضافة لأرز بشعرية و بطاطس لهواة الطبيخ و تقريبا بيقدم حمام مشوي ، المنيو مش كبيرة و الاختيارات محدودة و من الغريب انك متلاقيش في مطعم مشويات مكان للفراخ المشوية مثلاً.
قررنا اننا نطلب تلت مشكل لكل واحد مع ربع سجق لينا كلنا للتجربة، نزلت الطلبات مع سلطات طحينة و سلطة خضراء و مخلل خيار بالإضافة لبابا غنوج، بالنسبة للسجق كان معقول لكنه مكنش الأفضل لو قارناه مثلاً بسجق صبحي كابر في روض الفرج أو بسجق النجاحي في الغورية، بالنسبة للكفتة فكانت جيده جدا و اللحمة مستوية بشكل ممتاز بالإضافة إلى انها لحمة بلدي و تم اختيارها بشكل جيد، التقييم بشكل عام كان جيد جدا و يمكن أفضل من أماكن كتير موجودة و لها شهرة عنه.
تعامل العاملين في المطعم كان جيد و محترم و تجاوبهم مع الطلبات كان سريع، الطلبات متأخرتش كتير يمكن ربع او تلت ساعة فقط، الحساب تقريبا كان متوسط 100 جنيه للفرد و ده كسعر أكتر من أماكن تانية زي صبحي كابر مثلاً، أحد أصدقائي كان شايف انه أكثر من المطلوب كسعر، لكن في المجمل اتفقنا كلنا على جودة الأكل المتقدم، لو عديت في شارع الجيش و كنت جعان ممكن تنزل في مطعم ابو طاهر السياحي، هتبقى تجربة كويسة بإذن الله.