“هتعمليه في البيت أروع من المطاعم” طريقة تحضير الحمام المحشي بالأرز بمذاق خرافي وشكل يفتح النفس
يُعتبر الحمام المحشي بالأرز من أكثر الأطباق الفخمة التي تحجز مكانها دائمًا على موائد المناسبات والعزومات الكبيرة في البيوت المصرية والعربية، خاصة أنه طبق غني بالبروتين والنكهة، ومع ارتفاع أسعار الأكلات الجاهزة، بدأت كثير من السيدات بالبحث عن طرق مضمونة لتحضيره في المنزل بنفس جودة المطاعم بل وأفضل، ولأن تحضير الحمام المحشي يعتبر فن ومهارة، جمعنالك هنا الطريقة الكاملة من أول خطوة لغاية التقديم، بمكونات بسيطة وخطوات واضحة علشان النتيجة تطلع أكثر من رائعة.
المكونات الأساسية لتحضير الحمام المحشي بالأرز
قبل ما نبدأ التحضير، لازم نجهز كل المكونات الضرورية اللي هتخلي وصفتك ناجحة من أول مرة، المكونات دي متوفرة وسهلة، وبتضمنلك طعم قوي ومغذي:
- 9 حمامات صغيرة الحجم منظفة جيدًا.
- 3 أكواب من الأرز المصري مغسول ومصفى.
- 2 بصلة كبيرة مفرومة ناعم.
- ملعقة كبيرة من السبع بهارات لتعزيز النكهة.
- ملعقة كبيرة من الفلفل الأسود.
- ملح حسب الرغبة.
- رشة من جوزة الطيب تضيف نكهة فاخرة.
- رشة قرفة خفيفة للمسة شرقية.
- كبد وقوانص الحمام مقطعة صغير.
- ملعقتان من السمن البلدي.
- ماء ساخن للسلق.
- ورق لورا – حبهان – حبة طماطم – بصلة كاملة للتسوية.
- قليل من اللبن لدهن الحمام قبل التحمير.
- زيت غزير للتحمير.
طريقة تحضير الحمام المحشي زي المحترفين خطوة بخطوة
لو عايزة تعملي الحمام بطريقة مطاعم وبشكل احترافي، اتبعي الخطوات دي بدقة وصدقيني هتبهري كل اللي يدوقه:
- أول خطوة مهمة هي تنظيف الحمام كويس جدًا، انقعيه في محلول من الماء والخل والملح لمدة نصف ساعة على الأقل عشان تتخلصي من أي شوائب أو روائح.
- بعد ما تنقعيه، اغسليه كويس وجففيه تمامًا، ثم افركيه بالملح والفلفل من الداخل والخارج علشان الطعم يتغلغل جوه.
- في طاسة، سخني السمن وقلبي فيه البصل لحد ما ياخد لون دهبي جميل.
- أضيفي الكبد والقوانص وقلبيهم شوية، بعد كده ضيفي البهارات كلها وقلبي تاني.
- نزلي بالأرز وقلّبي المكونات كويس جدًا، وبعدين ضيفي كمية من الماء مناسبة لحد ما يبدأ الأرز ياخد نص سوا.
- ارفعيه من على النار، وسيبيه يبرد شوية قبل ما تبدأي تحشي بيه الحمام باستخدام معلقة صغيرة.
- بعد الحشو، اقفلي الحمام باستخدام خيط أو أعواد خشب صغيرة علشان الأرز ميفلتش أثناء السلق.
- في حلة كبيرة، اغلي ماء وضيفي لها ورق اللورا، الحبهان، البصلة والطماطم، وبعد الغليان نزلي الحمام وسيبيه يستوي على نار هادية حوالي 35-40 دقيقة.
- لما يستوي، طلعيه وصفيه كويس من المرق.
- ادهني الحمام من الخارج بقليل من اللبن علشان ياخد لون رائع لما يتحمر.
- في زيت غزير وساخن، حمّري الحمام لحد ما ياخد لون دهبي لامع يخطف النظر.
- طلّعيه وصفيه من الزيت، وقدميه سخن مع شربة الحمام أو ملوخية حسب الرغبة.
- نصائح للحصول على نتيجة مثالية
- ما تكتريش الأرز أثناء الحشو عشان يفضل الحمام محافظ على شكله ومينفجرش وقت السلق.
- اللبن قبل التحمير بيخلي لون الحمام يوصل لدرجة ذهبية مميزة جدًا.
- تقدري تحفظي الحمام بعد السلق في التلاجة وتحمريه وقت التقديم، ده بيسهّل عليكِ التنظيم في العزومات.
- تقديم الحمام مع المخللات أو البطاطس المحمرة بيكمل الوجبة بشكل مثالي.
وبكده تكوني عرفتي كل أسرار تحضير الحمام المحشي بالأرز في البيت، بطريقة ولا أسهل، وطعم يفوق الوصف، حضريه لضيوفك أو لعيلتك في عزومة، وهتسمعي منهم أحلى كلام!