بشرى سارة لأصحاب المعاشات تزفها وزارة التضامن الإجتماعي

الكدب يتواصل وتنزل الاخبار الخادعة تقول تزف البشرى لاصحاب المعاشات اكثر من 5 مرات وعلى القنوات الفضائية يقول لك غرفة عمليات لمتابعة صرف المعاشات ومواقع الانترنت تنقل الخبر وهو كاذب معذورة مواقع الانترنت ويقول لك اللى تواجهه مشكلة يتصل بالخط الساخن ايه الخداع والكدب ده والقنوات الفضائية مثل قناة النيل للاخبار موش تنشر الخبر ثم تتابعه لأ تنشره سواء حقيقى او خداع او مغلوط افتحوا التليفونات وتواصلوا مع اصحاب المعاشات الغلابة الناس هتموت والمصحف الشريف الناس هتموت لان تصريحات الوزيرة المخادعة جعلت الناس اللى شايلة فلوس تصرفها حتى انتهاء الشهر وبدء صرف المعاش الجديد الناس صرفت الفلوس ده بسبب تصريحات الوزيرة ودعوتها للناس بان 6 مليون ما يقابل 79% من اصحاب المعاشات هيصرفوا معاشاتهم ليلة 31 اغسطس مما دعا الناس لصرف ما بقى معها من فلوس لشراء ما يمكن من التزامات العيد وبالتالى الفلوس المركونة اتصرفت والمعاش لم ينزل فى الماكينات ينفع الكلام ده ارحمونا احنا بنى ادمين حرام عليكوا

المعاشات اصلا لسه مانزلتش كدابه غادة والي

اكذوبة غرفة عمليات لمتابعة صرف المعاشات هو خبر كاذب نازل فى شريط الاخبار فى قناة النيل للاخبار نحن لم نصرف المعاش كما وعدت معالى الوزيرة ونقضى العيد بدون اموال لا يوجد غرف عمليات ولا شىء ولا احد بيسأل فينا والمسئولين بيقضوا العيد وبيستمتعوا بأكل الفتة واللحمة ونحن نعض على صوابعنا مينفعش كده احنا بنصرف المعاش الشهر الماضى واللى قبله مبكرا بمناسبة شهر رمضان وعيد الفطر والان تمنعوها ونحن فى عيد الاضحى والحجة كانت عدم قانونية صرف معاشين فى نفس الشهر طيب احنا دولقتى صرفنا اخر مرة فى اغسطس ونحن الان فى سبتمبر فما المانع للصرف حرام عليكوا احنا بنصرف يوم 10 لكن صرفنا مرتين يوم 1 فى الشهر وطالتنا السيدة الوزيرة ان ننزل نصرف مساء ليلة 31 اغسطس لجميع حاملى ATM لعدد 6 مليون صاحب معاش ولم نجد شيئا وصرفنا الباقى من المعاش على امل ان نصرف يوم 1 سبتمبر اول يوم العيد الا يوجد قرارات جريئة تحل مشاكل الناس ؟

المعاشات لم تنزل حتى الان الساعة العاشرة مساء

يا جماعة الخير انتوا عايزين تقبضوا المعاش الان وبعد كده تقعدوا 40 يوم من غير فلوس احنا كان نفسنا في منحة بمناسبة العيد زي بعض الموظفين اللي بيأخدوا منحة في كل مناسبة

المعاشات لم تنزل حتى العاشرة من نهار صباح يوم 1 سبتمبر بكارت ATM ولا يوجد وسيلة للاستفسار والخط الساخط يرد علينا موظفة حديثة الخبرة لا تستطيع مساعدتنا وبتطلب مننا الرقم التأمينى وبنعطيها الرقم التأمينى اللى فى ساركى المعاش وهو مكتوب وواضح جدا ونمليها به بوضوح وبتقول ده غير موجود له بيانات عندنا واحنا كل اللى احنا كنا بنطلبه منها انها تبلغنا هل معاشات يوم 10 نزلت والا لأ او هتنزل امتى لو لم تكن نزلت فتشترط علينا نمليها الرقم التأمينى ولا نعرف ما فائدة ان نمليها الرقم التأمينى لكى تدلنا هل المعاشات نزلت واللا لأ وبرغم ذلك نمليها الرقم التأمينى فتقول ايضا ان هذا الرقم التأمينى لا يوجد له بيانات وقلت لها انا رجل عجوز والمشوار لماكينة الصرف بعيد جدا وبتحمل مصاريف مواصلات وبمشى مسافات طويلة حتى اصل الى الماكينة فعايز اعرف قبل اما انزل علشان مروحش المشوار ده كله وادفع مواصلات على الفاضى