نشر المرشد السياحي لؤي أحمد مشاركة على حسابه الشخصي بموقع التواصل الاجتماعي ” فيسبوك” مجموعة من تصرفات بعض المصريين في العديد من الأماكن السياحية الراقية تحت عنوان: ” يستغيث مديري الفنادق في شرم الشيخ والغردقة ومرسي علم من السياحة الداخلية المصرية بسبب التالي.
وسننشر لكم التعليق كما هو كالتالي:
1 – سرقة ممتلكات الفندق
2 – عدم الإحترام للعاملين في الفنادق
3 – مسح أحذيتهم في ملايات السرير والبشاكير
4 – الإسراف والإهدار في تناول المأكولات والمشروبات
5 – الجمله الشهيره “أنا هنا بفلوسي”
6 – إلقاء المخلفات والقمامة فى أى مكان
7 – عدم النظام والهمجيه في المعاملات
8 – نزول البحر وحمامات السباحة بالملابس الداخلية
9 – بياخدوا الأكل ويلفوه فى كياس ويحطوه فى الشنط بحجة العيال بتجوع وهم بيعوموا رغم إن أغلب الفنادق فيها وجبات سناكس بين الوجبات على البيتش وجمب حمام السباحة
10 – الشباب المصريين بيغلسوا على الأجانب وبيديقوهم فى كل حاجه
- حضرتك لما تشرفنا في شرم الشيخ أو أي بلد سياحية في أي وقت تأكد إن من حقك ( من وجهة نظرك ) كل الآتي يا فندم :
- إنك تاخد البشكير والفوطة إللي في الغرفة وتخبيهم في الشنطة وإنت ماشي عادي
- تلم الملايتين وكيس المخدة برضه وتخبيهم وتاخدهم شغال
- شوكتين وسكينتين ومعلقة شاي إستانلس كدة ماركة حلوة علشان تنفع البنت في عزالها برضه مقبول ( بس لو هتركب طيران المطار هيبلغنا وهنيجي ناخدهم منك في المطارعلشان الإكس راي بيكشفهم وشكلك هيبقي وحش )
- تطمع في كارت الغرفة وكروت الفوط ده شئ يشرفنا يا فندم برضه أهو منه دعاية للفندق لأنهم عليهم شعار الفندق برضه
- ترص كاتيل الشاي والمجات في الشنط بحيث إنهم مايخبطوش في بعض ويتكسروا والبلمان يعرف وهو بينقل الشنط لحضرتك تبقي حريف
- تفك كفر قاعدة التواليت بحرفنة ولما الهاوس كيبينج يبلغ الريسبشن إن الكفر مش موجود في الغرفة يبدأ إستفسار من موظف الإستقبال لحضرتك وحضرتك تنكر وبعدين لما تلاقي مافيش مفر وشكلك هيبقي وحش وإتكشفت خلاص ولازم تفتح الشنط بتاعتك وشكلك مش هيبقي كيوت خالص فتعمل فيها 9 رجالة في بعض وتعلي صوتك وتقول دا أنا أشتريكم بفلوسي وشوفوا تمنها كام وخدوه على الجزمة تبقي فعلا حضرتك راجل سخي ومتشكرين على وافر عطاءك ومساهمتك معانا في التنشيط السياحي لقاعدة التواليت يا فندم
- تشغل التكييف ليل نهار حتى وإنت خارج ترفع الكارت من الباور سيفر و ( تحشر ) ورقة علشان سيادتك خارج الساعة 9 الصبح رايح البسين وهترجع الساعة 7 المغرب فمحتاج الغرفة تكون رطبة لإستقبال حضرتك فده شئ يسعدنا جدا إن حضرتك تبقي متكيف وتنحرق التكييفات وتولع فاتورة الكهربا خالص في سبيل راحة حضرتك في الغرفة يا فندم
- يوصل بيك الحال إنك تاخد الزبدة البوشن في أكياس بلاستيك وحضرتك عامل تشيك أوت ده شئ يخلينا طايرين من الفرحة يا فندم إن إحنا بنقدم أكل عاجب حضرتك لدرجة أنك واخد منه وأنت مروح كمان ( بس خد بالك دي لازم تتحفظ في درجة سالب 18 فممكن تسبب تسمم للأولاد وهي محفوظة في الشنطة لمدة يوم في درجة حرارة 40 يا فندم ) وإحنا طبعا عايزينكم تيجوا لينا تاني فخايفين عليكم من التسمم يا فندم
- تتقل على نفسك وتاخد كل الحاجة الساقعة إللي في الميني بار كل يوم وتداريها علشان الراجل يعمل ريفيلينج ليها كل يوم وحضرتك تاخدها وإنت مروح فده أكيد علشان تهضم الأكل الجميل بتاعنا في خلال شهر ما بعد الأجازة
- تفكر برا الصندوق وتفضي كل تيوب الشامبو والشاور جيل في إزازة مياه فاضية وترمي الفاضي في الباسكت علشان الهاوس مان يعرف إنك إستخدمتهم وماسرقتهم فدا شعور طيب من حضرتك تجاه منتجاتنا إللي بنقدمها لحضرتك
- تطفي على الأرض والطافية تقع على الفرش ويتخرم وننجدة تاني علشان الطفاية قدام حضرتك بس مليانة قشر برتقال ومكسل تقوم تفضيها عادي جدا يافندم عندنا عم نبوي المنجد هينجد الفرش كله بعد ماحضرتك تقضي أجازتك براحتك وتمشي يافندم
- من حقك علينا حاجات كتيرة جدا يا فندم غير دي كمان ومن واجبنا إن إحنا نقدمها لحضرتك ولو فيه أي تقصير من حد من زملائي العاملين بقطاع السياحة فأتمنى تقبل إعتذار من أخوك الصغير مصطفى الخشن ( موظف صغير )
لكن إللي مش من حق حضرتك بقي :
- وإنت قاعد في اللوبي تأزأز لب وترمي القشر على الأرض ( بلاش أقول اللفظ التاني ) لم أولادك جنبك وخليهم يوطوا صوتهم ويعرفوا إن ده لوبي فندق وفيه ناس تانية من جنسيات تانية قاعدة وشايفة المنظر وبتصور وتفضح على النت وماتشغلش بالك بالقشر هنبقي نكنسه بعد ما تقوم
- مش من حق أولادك إنهم يستخدموا تكاية الصوفة على إنها كورة شراب لأن إحنا عملناها لحضرتك تتكئ عليها وفيه ناس حواليك بتصور الأولاد وهما نتيجة ماتشهم بالتكاية تلاتة واحد لصالح عمر الصغير
- سيب الأقلام الرصاص في البيت وإنت جاي لأن حيطة الغرفة مش سبورة سنة تالتة رابع فبلاها مذاكرة الأسبوع ده
- مش من حقك يا مدام لما إبنك يعمل ببي جنبك وإنت على الشازلونج إنك تقومي تقلعيه الحفاضة وترميها على طول إيدك في ( الجونينة ) وتغسلي لإبنك مكان الببي في حمام السباحة على مرئى ومسمع كل الحاضرين لأن فيه خمسن ستين واحد أجنبي حواليكي بيصوروا ويرفعوا على مواقع التواصل الإجتماعي في لحظة وكذلك مواقع شركات السياحة يعني حضرتك بتأثري علي السياحة كلها يعني حضرتك جزء من خراب إقتصاد دولة ناهيكي عن غلق حمام السباحة وعمل صدمة كلور ليه علشان نلم الفضايح ونحافظ على صحة الباقي
- مش من حقك تعامل الموظف على إن دا الخدام إللي باباك قالك روح يابني هتلاقي عثمان الخدام كتير هناك دا حضرتك ممكن يكون راجل متعلم أعلي منك ومتحضر وإبن ناس ومتجوز ومخلف وبيقبض مرتبه من صاحب الفندق مش من حضرتك فدوره أنه يوفر كل سبل الراحة ( المشروعة ) لحضرتك يعني مش خدام دا مضيف
- مش من حقك تمد إيدك على شنطة نزيل جنبك نزل حمام السباحة وساب أغراضه ومأمن عليها بس الآيفون 7 زغلل في عنيك وماحدش واخد باله لإنك بتفضحنا على الملأ وكاميرا المراقبة جايبة حضرتك على الشاشة وإنت مش واخد بالك
- مش من حقك تغرف أكل يكفيك لو إنت في بيتك إسبوع على الأقل علشان إنت مكسل لو خلصت تقوم تجيب تاني فبتجيب مرة واحدة وإللي يفيض الخدامين يبقوا يشيلوه ( ولتسئلن يومئذ عن النعيم )
- مش من حقك تعتبر المطعم هو كافتريا أم حسن وتنادي على المدام وهي على البوفيه تقول ليها ( صوباعين كفتة جريل ) وإنت جاية يا سناء لأن فيه أجانب جنبك وملاحظين ومتأذيين
- مش من حقك تعامل الراجل المسؤول عن نضافة غرفتك بشكل مهين لأنه مش فتحية الشغالة وخد بالك دا ممكن يكرهك في رحلتك بكل هدوء وبرود أعصاب
- مش من حقك تنشر ( الترنج والمنطلون ) في التراس ( البلكونة ) أو تفردهم على الزرع في ( الجونينة ) علشان يلحقوا ينشفوا لأن أنتم نازلين بيهم خليج نعمة بالليل
- مش من حقك تحسسنا إن كل أعمالك ومشاريعك وقفت بسبب إن الواي فاي عندنا ضعيف لأن متوسط سرعات الأنترنت في الفنادق 60 ميجا في الثانية ( لكل النزلاء ) فمش فرض علينا يا فندم نحمل لحضرتك ( فيلم ) مدته ساعتين تلاتة في ثانيتين تلاتة حاول تأجله لما تنزل وإعمل له داونلود في مقر الشركة وهناك هتلاقي سرعة واحد ميجا ممتازة وسريعة
- مش من حقك إنك بعد ما يتوفر ليك كل سبل الراحة خلال فترة إقامتك بس لأنك عايز تقعد يومين كمان على حساب الفندق فبتصطنع مشكلة ولما تتزنق وتلاقي الموضوع مفقوس فتكتب على المواقع السياحية إن دا فندق كوخة ( خد بالك إن العالم كله بيقرا الكومنت دي ) فأنت بتأثر على إقتصاد دولة
أعذر جهلي وشدة إسلوبي بس ده لأن إحنا أتربينا وإتعلمنا في مدارس سياحة صح ( زمان ) إللي تقريبا ماعدش باقي منها حاجة في الوقت الحالي
الخلاصة يا فندم إن من حقك تستمتع ببلدك وإحنا نضايفك أجمل ضيافة أكتر من الأجنبي مليون مرة
وتأكد إن حضرتك أهم بالنسبة لينا من الأجنبي أبو عنين خضر بس كل ما في الأمر إن إحنا عايزينه لما يمشي يرجع تاني أو يبعت غيره علشان العجلة تدور ناهيك عن إن حضرتك كنت ومازلت سبب رئيسي في عدم وقوع السياحة بوقوفك جنبها وتشجيعك للسياحة الداخلية يعني من حقك تاخد إللي من حقك وده لأن صاحب الفندق بيكسب من وراك ومش من حقك تعمل إللي مش من حقك لأن إقتصاد البلد بيتأثر برضه من وراك
خليك إيجابي وإظهر أجمل مافيك وخليك سفير لبلدك قدام كل الأجانب ووصل رسالة حلوة للناس يمكن تكون سبب في فتح بيت حد غيرك بسبب فعلك الطيب
وتأكد إن إللي بيعمل الحاجات دي عدد بسيط جدا من الناس إللي بتشرفنا لكن زي ما المثل بيقول الحسنة بتخص والسيئة بتعم علشان كدة إللي بيمشي من عندنا بيقول المصريين كذا وكذا
دمتم طيبين وآسف جدا على الإطالة
وأتمنى لو أن البوست ده يوصل للسادة المسؤولين ليدركوا ما آلت إليه الأوضاع
لو شايفه كلام مفيد وقريت البوست للآخر قول لينا وجهة نظر حضرتك وأعمله شير يمكن نكون سبب في التغيير
وإظهر أجمل مافيك •••
https://www.facebook.com/permalink.php?story_fbid=10213996266159958&id=1209776614
تسلم اليد اللي كتبت هذا المقال
أرى أنك صبيت جم غضبك وانتقاداتك علي رواد الفندق من المصريين ونسيت برضه الدخان والبقشيش الإكرامية وخلي الباقي عشانك و التي تدفع لبعض عمال الفنادق إلي هما مصريين برضه بالرغم من ذلك أحترم وأقدر الموضوع.
انا واثق انك من اللي اتكلم عنهم …….. من اصحاب فكر انا هنا بفلوسي
الحاجات اللى حضرتك قولتها ممكن تكون بتحصل بس بسيط جدا انا بسافر كتير مش بشوف اى حاجه من الكلام ده انت خليت شكلنا وحش اوى اوى اوى
الحقيقة اللى محدش عايز يفهمها واللى هى سبب لكل اللى قولته هى :
1= العروض اللى بتتعمل للمصريين بنظام رحلات ال 3 ليالى بتجذب فئة مكانها مش فى فنادق ال 5 نجوم (أقصد مكانها المادى والثقافى والفكرى والمعرفى)، عملية التسويق للمصريين بتتم غلط
2= لازم تعرف النزلاء المصريين اللى جايين افواج تبع شركة سياحة شاحناهم فى اتوبيسات مالهم وماعليهم وتخلى شركة السياحة تدفع تأمين للفندق ويكون فى مندوب لكل شركة سياحة هو المسئول عن الغرف اللى استخدمها
3=لازم يكون فى اجراءات رادعة أو محفزة من الفنادق تجاه المخطئ زى انها تديلوا فلوسه وتقوله آسفين مكانك مش هنا ، أو انها تستخدم التحفيز وتديلوا كوبون خصم 50% خلال عام لو كان سلوكيا على المستوى المطلوب ويا حبذا لو اديتلوا كارت صغير زى كروت الافراح بتوجهلوا فيه الشكر وتدعوه لزيارة المكان خلال 6 شهور فى اى وقت يختاره بنصف الثمن وده لانه واجهة مشرفة للفندق (اسلوب دعاية ذكى يعنى) لو ده حصل مرة واحدة بس مع مخطئ او شخص جيد الثقافة كلها هتتغير
تمنياتنا بمستقبل افضل للسياحة المصرية
مش كل المصريين كدة
علي فكرة ابو علاء كان عندة حق انه ميدخلش المصريين
مش في مجال السياحة بس الانسان المصري ده طبعة ومش حيغيرة لانة تربي علي كدة في زمن الفساد وعشان كدة احنا مش بنتقدم بالعكس بنتاخر ونفس المصري دة في الدول التانية بيكون اكتر انسان محترم عارف لية لان احنا بنخاف مش بنختشي
من رأيي توزيع كتيب يشمل كل هذه السلبيات علي النزلاء المصريين ليكونوا على وعي بكل هذا وطبعا السبب في كل هذا نقص التعليم والتعليم الخاطئ وقلة التدين ولك الله يا مصر
هم دول المصريين فيهم ناس مستهترة طيب ولية بتحجزولهم بس اعرف فنادق كل نزيل بيسلم سكنة كامل زى مااستلم ودة سلوك مش هيتغيرولى ملاحظة اعملو شاطىء للمصريين ينزلو فية واكتب النزول بالملابس الرسمية المصريين اهم