بافلو برجر Buffalo burger .. برجر لذيذ لكن خدمة سيئة

بافلو برجر Buffalo burger .. برجر لذيذ لكن خدمة سيئة
بافلو برجر Buffalo Burger

النهاردة قررت اني اتغدى بس أجرب مطعم جديد مكنتش جربته قبل كده و لأننا في تالت أيام العيد ودي أول مرة أخرج في العيد من زمان كنت مستغرب الناس وكمية الأطفال الكبيرة اللي في المطاعم بعد ما خدوا العيديات وراحوا يصرفوها، بالهنا طبعاً و كل سنة وكل العائلات بخير وكل الأطفال سعداء.

لما نزلت قررت أروح مطعم بيقدم برجر و كان قدامي ماكدونالدز وهارديز وعلى الناحية التانية كان بافلو برجر اللي قررت اني اروح له وأجرب حاجه جديدة، الفرع اللي رحته كان فرع الهرم اللي عند محطة العريش وده فرع مساحته صغيرة وكان زحمة والتكييف كمان مش شغال.

لما جيت أطلب الأوردر كان الكاشير نفسه بيساعد زمايله و بيظبط أوردرات دليفري ومكنش فاضي ياخد الأوردر من الناس في الصالة وكل شوية يقول لي لحظة واستنى رغم ان الاوردر المفروض مش هياخد اكتر من 30 ثانية بالظبط علشان ياخده و يبدأ في تحضيره، ده كان أول انطباعي و كان حاجة مش تمام بس قررت أكمل لأني عذرته برده خصوصا مع العيد والاوردرات كتير.

طلبت الأوردر وكان بيكون مشروم جاك Bacon mushroom jack، وده عبارة عن قطعة برجر لذيذة -بتختار حجمها 150 أو 200 أو 250 جرام- ومظبوطة عليها مشروم وقطع بيكون بقري مع صوص مايونيز، كنت عاوز أشوف و أجرب حاجات تانية بس المرة دي كنت لوحدي مش مع أصحابي زي ما كنا في صبحي كابر وكبدة البرنس.

رحت علشان أقعد لقيت طرابيزة فاضية بس مش عليها أي كراسي، كلمت 2 من المطعم علشان الكراسي واحد قال لي لحظة وفي الاخر مفيش حاجه جت، و التاني قال لي الكراسي بره هات لك كرسي!، ولأني كنت عاوز أجرب الأكل فعلاً ومش عاوز أبوظ التجربة جبت كرسي واستنيت حوالي تلت ساعة لحد ما الأوردر جه.

الطعم كان لذيذ ومميز ومن أفضل البرجر اللي كلته قبل كده، كنت طالب كومبو وللأسف البيبسي مكنش ساقع، الخلاصة في تقييم بافلو برجر ان الطعم كويس لكن ممكن يبوظه مستوى القعدة وطريقة التعامل والإضافات اللي مش بيتعمل حسابها وده مينفعش خصوصاً وانت دافع ثمنها، عموما لولا ان اليوم عيد وان الدنيا كان شكلها تقيله على استاف المطعم كان ممكن أقرر بسهولة اني مروحش هناك تاني، لكن ممكن أروح تاني في وقت مش يوم عيد وساعتها هقدر أقيم المطعم ككل بشكل أفضل.

منيو بافلو برجر Buffalo Burger
منيو بافلو برجر Buffalo Burger
منيو بافلو برجر Buffalo Burger
منيو بافلو برجر Buffalo Burger