كشف الدكتور حاتم البنا، في تدوينة على حسابه الشخصي بموقع التواصل الاجتماعي الـ”فيس بوك”، حصلت على أكثر من ١٤ ألف إعجاب و١٠ آلاف مشاركة خلال ساعات عن احتمالية انتشار مرض نقص المناعة المكتسب “الإيدز” داخل الإسكندرية.
وحذر “حاتم” عن مصادفته فتاة اكتشف أنها مصابة بالمرض، لاسيما العلاقات التي كان يقيمها الرجال في الشارع معها وكتب: “جاتلى من كام يوم واحدة ست شيك في أواخر الأربعينات ومعاها بنت حاجة وعشرين سنة، من ملابس البنت وشكلها واضح إنها عايشة فى الشارع… المهم الست دي كانت ماشية وشافتها صعبت عليها جابتها تكشف عليها”.
وتابع “البنا” بالتدوينة: “المهم كشفت عليها كشف ظاهري كده، البنت واعية كويس وبتفهم كويس مش متخلفة عقليا يعني، وهي متعرفش أهلها، هي طلعت لقت نفسها في الشارع، طبعا جسمها كله سحجات خفيفة كده، وشكيت من الكشف إنها حامل لأن بطنها كانت كبيرة شوية، سألتها: أنتى متجوزة؟ قالت: لأ.. استدعيت دكتور النسا عملها سونار وفعلًا طلعت حامل في أربعة شهور، ومكانتش تعرف، وقالت إنها كانت حامل قبل كده وسقطت في الشارع كده من غير أي رعاية طبية”.
وتابع أنه سألها مين والد الجنين؟!، قالت معرفش، في كذا حد بيعتدي عليها جنسيا وهي كانت بتقاوم زمان بس لقت إنها بتتضرب وتتعور وفي الآخر بياخدوا اللي هما عاوزينه – على حد تعبيرها- فمبقتش تقاوم، وعلى حد وصفها أنهم بالمئات؛ لأن كل واحد كان بينجح أنه يعمل معاها حاجة كان المرة اللى بعدها بيجيب أصحابه معاه، وأصحابه يجيبوا أصحابهم”.
وقال: ” إن حالتها الصحية زي الزفت حرفيًا، عندها نزلة شعبية، وطبعا أمراض جلدية، درجة حرارتها عالية، وغيره وغيره من البلاوي، طبعا عملت لها حبة تحاليل شاملة كده صورة دم ووظايف كبد وكلى وتحاليل فيروسات كبد وغيره من التحاليل اللى بتعملها لحد جاى من الشارع.. خلصت وكتبت للست روشتة مبدئية أعالج فيها الحاجات الظاهرة لغاية ما نتيجة التحاليل تظهر وتيجى نكمل العلاج.. الست مشكورة تكفلت بكل الأمور المادية وتعهدت برعايتها إلى أن تجد مكانا يتولى أمرها.. كل القصة المأساوية دى مش هى السبب إنى باكتب البوست ده… لأن وللأسف أنا مش أول ولا تانى ولا عاشر مرة أشوف حاجة زى كده وما أعتقدش أنها آخر مرة”.
وحذر كل أهالي الأسكندرية لكون الفتاة بالأسكندرية من انتشار مرض الإيدز خاصة بعد المئات الذين أقاموا علاقات جنسية مع الفتاة وكتب: «أنا باكتب البوست ده لأن التحاليل طلعت.. البنت طلعت HIV+ve، البنت طلع عندها إيدز!! أنا باكتب البوست ده عشان لو أي حد مسئول شافه لازم كل الشباب اللي في المنطقة اللي البنت دي كانت موجودة فيها يتعملهم screening tests أو تحاليل إيدز، خصوصا سواقين التكاتك من الشباب، لأنها قالت إن معظمهم كانوا سواقين تكاتك وأصحابهم.. يا ريت يا جماعة شير لغاية ما نوصل لحد.. المعلومات الخاصة باسم البنت ومكان تواجدها والمنطقة اللي المفروض يدوروا فيها على الشباب دول أنا شيلتها للحفاظ على خصوصية المريض، وهي متوفرة لأي مسئول يحب يتصرف وياخد خطوة في الاتجاه الصحيح، ولا حول ولا قوة إلا بالله”.
وكتب البنا تدوينة أخرى، بخصوص ملخص الأحداث في تطورات حدثت في موضوع البنت المصابة بالإيدز، يصف حجم المعاناة التي لاقاها من رجال الأمن والمسئولين والاستهتار التام لما حد للفتاة وما سينتج عنه من انتشار المرض بالإسكندرية جراء الشباب الذين مارسوا معها علاقات جنسية فبالتأكيد هم أيضا مصابون وناقلون للمرض الذي سوف ينتشر وتفشى بالمحافظة بواسطتهم.
