في يوم مباراة مصر و غانا و الماتشات عموماً بتبقى الصحبة حلوة و ناس كتير بتحب تشوف الماتش مع بعض، يمكن جو المشاركة بيدي احساس اجمل للفرح و بيخفف حالة الحزن لا قدر الله، جزء من المشاركة بيكون في البيوت قدام الشاشات و أحيانا ناس بتحب الكافيهات تنزل تتفرج فيها سواء في الشوارع أو المولات.
قررت انا و صاحبي أحمد اننا نشوف الماتش المرة دي في اي كافيه في سيتي ستارز، و بشكل عشوائي لقينا The Garden Cafe و شكل القعدة حسينا انه كويس خصوصاً مع وجود شاشة عرض، الكافيه موجود في الدور الأرضي قريب من صالة المطاعم Food court.
لما قعدنا كان أول حاجة قالوها لنا ان الحد الأدنى للفرد هو 50 جنيه، مكنش عندنا مشكلة لكن البداية كأسلوب حسيناها مش لطيفة، بعد كده جات المنيو اللي بالتأكيد الأسعار فيها متغيرة عن الأول، قررت اطلب عصير برتقال و فطيرة تفاح Apple pie، في حين قرر هو انه يختار حاجه تانية قهوة اسبرسو و فطيرة تفاح برده !
العصير جه بعد كده فيما يشبه البرطمان – بجد – لكن له يد و ” البرطمان ” ده جواه كوبايه كجزء منه فيها العصير و يبدو ان البرطمان ما هو الا وسيلة علشان يحسسك ان الكوباية كبيرة في حين ان كمية العصير قليلة مقارنةبكافيهات تانية قعدنا عليها و ان كان السعر أكبر، القهوة مع أحمد مكانتش تمام قوي، طبعاً مكنش فيه سكر على الطربيزة و مجاش الا لما طلبناه.
الفطيرة كانت سيئة للغاية اولاً شبه متحجرة أو بسكوتية أقرب منها لكونها فطيرة و التفاح مكنش طعمه تفاح و مكنش كله طعم واحد بالإضافة الى انها كانت صغيرة في الحجم يعني كماً و كيفاً كانت سيئة، ممكن لو حبيت أديلها تقييم أقدر اديلها 3 من 10 و أحس اني بجاملها، طبعاً قدموا معاها شوكة فقط و مكنش فيه سكينة أو أي حاجه تقدر تقطع بيها، أحمد مرضاش ياكلها.
قررنا اننا نطنش الأكل و الشرب و نركز في الماتش للأسف الشاشة كانت ألوانها باهتة في حين ان شاشات التلفزيون التانية كانت ألوانها فيها تباين فاقع جداً فمكنتش مريحة في نفس الوقت، القعدة مخففش عننا فيها غير ان مصر فازت بالماتش و ده يمكن اللي مشانا من غير ما نبقى متضايقين قوي، لكن قرار كبير كان جوانا هو اننا مش هنشوف ماتشات هنا تاني ده بعد ما دفعنا لكل فرد تقريباً 80 جنيه محسيناش اننا استفدنا منهم بأي حاجه.
