التخطي إلى المحتوى
بالفيديو| “مشهد يكسف والأهلي محترم”.. انفعال عمرو أديب بعد واقعة أتوبيس الزمالك

استنكر الإعلامي عمرو أديب ما حدث بالأمس من تأخر أتوبيس فريق الزمالك  للوصول إلى استاد القاهرة، لخوض مباراة النادي الأهلى فى الأسبوع الرابع من الدورى، ولم يصل الأتوبيس إلى الاستاد حتى أنهى الحكم المباراة.

علق أديب على ما حدث قائلا “ببساطة شديدة مشهد يكسف، يسئ للكرة المصرية، مشهد محدش في مصر مبسوط منه، شكلنا وحش، وسيبكوا إن المشهد وحش قدام العالم بره، محدش هيتابع دولة يجرى فيها الكلام ده، الناس كلها مش مبسوطة”.

وتابع قائلا “في جملة فاصلة، أتوبيس بتاع الزمالك والأهلي، تقليديًا عندما يخرجان من معكسر أو نادي اللعيبة، يخرج معه الأمن، والنهاردة بالذات عشان المطر طلع معاهم أمن، سؤال بسيط،  الأمن اللي كان ماشي قدام عربية الزمالك عملت إيه، هل الأتوبيس بعد ما طلع بشوية وقف ونزلوا اشتروا ماية، ولا نزلوا جامع ودخلوا يقضوا حاجتهم، هل صحيح الأتوبيس نزل رمسيس بدل ما يكمل كوبري أكتوبر، المسؤول الأول هو الأمن المصري”.

وأردف “الدوري كده كده رايح رايح، الأهلي خد الدوري ويستحق، منظر الأهلي في الأستاد محترم، لاعيبة محترمين، وإدارة محترمة، تحترم دوري وتحترم  جمهور، وتحترم رياضة، اللي حصل ده أنا بسال بس سؤال هل الأتوبيس ده مكنش رايح، ده قعد 4 ساعات يوصل، رجع إزاي النادي في نص ساعة، هل صار الأتوبيس بما يرضى الله، أنا بقول الكلام ده وأنا زمالكاوي، بس حقيقي تألمت من المشهد، وإننا نوصل لهذا المستوى”.

وأضاف “أنت بتعلم الشباب اللاعيبة الصغير اللي قاعدين جوه الأتوبيس دول إنت بتعلمهم إيه، المشهد ده لازم حد يتحاسب عليه يا جماعة، الحساب الجماهيري، الحقيقة تبان، وكل واحد يبان على حقيقته، أنا بسأل وأنا متأكد أن هذا الأتوبيس كان مرافق له الأمن المصري”.

شاهد فيديو تعليق عمرو أديب على واقعة أتوبيس الزمالك…

التعليقات

اترك تعليقاً

لن يتم نشر عنوان بريدك الإلكتروني.