بالفيديو| حسام غالي يكشف أسباب استبعاده من المنتخب في كأس العالم

بالفيديو| حسام غالي يكشف أسباب استبعاده من المنتخب في كأس العالم
حسام غالي

طرح الإعلامي الرياضي أحمد شوبير سؤال على الكابيتانو حسام غالي، نجم النادي الأهلي قائلًا “لما بتراجع نفسك بتلاقي إن حسام غالي كان عصبي في بعض الأوقات وده خسره بعض الأمور مثل إنك تروح كأس العالم مع المنتخب اللي هو أكيد حلم؟”.

فرد غالي خلال حواره ببرنامج “مع شوبير” المذاع على قناة صدى البلد، قائلًا : بالعكس أنا كنت هادي جدًا من أول مستر كوبر إنضمت لمنتخب مصر، وبدون سبب استبعدت، وبعدت عن أي تصريحات ومتكلمتش عن الراجل خالص، وكنت ماشي في الدوري كويس جدًا”.

وتابع غالي “كانت كل الناس بتتكلم عن ضرورة إنضمامي للمنتخب، سواء من الجمهور أو غيره، وكان مستر كوبر يطلع في المؤتمرات الصحافية يقول أنا عندي أربعه في وسط الملعب هما النني إبراهيم صلاح طارق حامد أحمد توفيق، ولا يذكر اسمي نهائي، وقعد فترة طويلة مستبعدني”.

وأضاف غالي “ثم زاد الضغط على كوبر، ولعبت كويس في متشات كتير، فأخذني، في بداية تصفيات كأس العالم، كنا بنلاعب تشاد، وكنت على الاحتياطي أنا وعبد الله السعيد، وكان بيلعب بخطة معينة، وغير فكره بعد الماتش ده، مش عارف جاله تعليمات ولا إيه إن لازم أنا و عبد الله السعيد نلعب لأننا كنا احتياطي، ولما غير الطريقة كسبنا تشاد هنا”.

وأكمل غالي قائلًا “في ماتش نيجيريا لعبت 10 دقائق هناك و10 دقائق هنا، ثم حدث الموقف اللي كل الناس عارفاه، وبعدين كل الاستبعاد الفترة الطويلة، مقولتش أي تصريحات، ومتأكد إني موقف كان صحيح وسليم مليون في المية، ومكنتش ندمان، أنا خدت موقف ومش ليا وحدي لزمايلي في الفرقة، كانت طريقة المعاملة لم تكن كما يجب”.

وأضاف غالي”عبرت عن اللي جوايا في أوضة مقفولة، ولا أندم على موقفي/ ودي صفحة واتقفلت، حتى لو كان الثمن إني خارج كأس العالم”.

وأضاف غالي “كأس العالم حلم كبير، وأنا خدت موقف ولازم اتحمل نتيجته، حتى لو كان تمنه البطولة المفضلة لكل اللاعيبة، ولن أطاطي وأعتذر، ما دمت  لا أرى أني أخطأت، ولم يقف بجواري أي شخص من المنتخب”.

شاهد الفيديو….