تعرف على حقيقة “أتجوز روسية وخد الجنسية و15 ألف دولار”

تعرف على حقيقة “أتجوز روسية وخد الجنسية و15 ألف دولار”

انتشرت في الآونة الأخيرة على مواقع التواصل الاجتماعي فكرة جواز المصريين من الفتيات أصحاب الجنسية الروسية، مقابل الحصول على الجنسية الروسية بالإضافة إلى الحصول على 15 ألف دولار أمريكي، كهدية من السيدة الروسية للشخص الذي يتزوجها.

دفع هذا الأمر أحمد حجاجوفيتش، الرحالة المصري للبحث عن الأمر، وخاصة بعد أن وردته الكثير من الرسائل تسأله عن مدى صحة هذا الكلام.

تواصل حجاجوفيتش مع مسئولين روس للتأكد من صحة الموضوع، واكتشف مدى كذب الموضوع، ونشر على صفحته الشخصية على موقع التواصل الاجتماعي “فيس بوك”، يفيد بأن هذا الأمر كله نصب.

حيث نشر حجاجوفيتش  يقول :”مصريين كلهم اليومين اللي فاتوا دول معندهومش سيرة علي الفيسبوك غير موضوع “إتجوز روسية” و خد الجنسية، و ١٥ ألف دولار أمريكي، هدية من الحكومة الروسية” و جالنا مئات الرسائل الخاصة بتسألنا عنها ،حجاجوفيتش سأل مسئولين روس عن الموضوع ده عشان يعرف الحقيقة و الكلام اللي جاي ده مهم جداً جداً لكل الناس المهتمة بالموضوع و حيكون صادم للبعض بس إحنا بنقولهلكم عشان متتجروش ورا آمال زائفة ..

الكلام ده إتضح إنه “خبر ساخر” في إحدي الصحف و لكن للأسف طلعت شركة نصب دولية كبيرة قوي إستغلت الكلام ده مش بس في مصر و لكن في العديد من الدول التانية كمان بأنها عملت مواقع علي الإنترنت “متخصصة في تسهيل الزواج من روسيات” و حاطين الخبر بتاع المكافأه و الجنسية و لما الواحد يدخل علي المواقع دي حيلاقي صور لبنات روس قمة في الجمال و الإغراء و لكن كلها طبعاً صور مش لبنات حقيقية مسجلة علي الموقع عشان الجواز و لكن مسروقة من صور شخصية في الفيسبوك وغيره من مواقع التواصل الإجتماعي المستخدمة في روسيا

المصيبة إن الآلاف من الشباب و الرجال حول العالم وقعوا ضحايا لعملية النصب دي، بإنهم بيدخلوا علي المواقع دي و يسجلوا كل بيانتهم و يحطوا صورهم و لازم عشان تكتمل عملية التسجيل يدفعوا مبلغ مالي بكارت بنكي … و لكن المصيبة إنك أول ما بتحط كل بيانات كارتك البنكي و تكتب رقمه و تاريخ إنتهائه و الرقم السري اللي علي ظهر الكارت و تدوس “تسجيل” ، بيتم سرقة الفلوس اللي في حسابك و لو كارتك “كريديت” يعني البنك بيدفعلك و بعدين إنت بتسدد للبنك بعد ٥٥ يوم، بيتم سحب كل المبلغ المتاح لك سحبه و بيتخرب بيتك .

الاسوأ من ده كله ان احد متابعي الصفحة بعتلنا رسالة امبارح انه اتسرق من حسابه البنكي ٩٤ الف جنيه بسبب الموضوع ده (نص الرسالة في اول كومنت) و ده اللي خلانا نكتب البوست ده و نحذر الناس كلها عن الفخ ده.. فرجاء من الناس كلها متدخلش حسابتها البنكية الا في المواقع المضمونة بس!”.

جدير بالذكر أن أحمد مدحت حجاج الملقب حجاجوفيتش رحاله مصري ومغامر وخبير سياحي عالمى اشتهر بابن بطوطة القرن ال 21.